الأحد، 1 أغسطس 2010

بعد الخسارة


لما بنخسر حاجة
أى حاجة أو كل حاجة
مهما كان اللى خسرناه
الواحد لما بيكون متعود عالوحدة فى كل جزء فى حياته
بيتمنى لو يفضل وحيد كمان أثناء زعله وغضبه
لأن مجرد المواساة من الآخرين
بتجرحه
بتحسسه إن فى مصيبة أعظم من اللى بيفكر فيها
كل واحد بيشوف الألم من وجهة نظره
يعنى لو حد مات او حتى خسرت فى شغل أو مشكلة مع البنت اللى بتحبها أو حتى إتخانقت ودخلت القسم وطلعت بمحضر وقضية ومشكلة
بتلاقى كل واحد بيشوف المشكلة بوجهة نظره وبيحس بالألم بطريقته
واحد مثلا بيعتبر البنات دول ولا حاجة فى الحياة ومجرد خسارتهم فهى مكسب
هيبص لك على إنك تافه وعبيط وإن مشكلتك هتنتهى بسهولة
واحد تانى شاف المرار من مراة أبوه أو أمه
فبيشوف إن خسارتك لحد من أهلك هوا أعظم مكسب فى الحياة
أعظم درجة من المكاسب من وجهة نظره أو يشوف ألمك بدرجة أعظم لو مر بظروف تحسسه بقربه من أهله
فبالتالى ...
بتلاقى نفسك ... يا إما بتحس بالإحتقار لألمك من الآخرين أو التعظيم للألم دا
ففى كلتا الحالتين بتحس إنك عايز تقف لوحدك
محتاج كوباية قهوة وتمارس طقوسك اليومية وبالك مشغول فى حاجة تانية
محتاج تلعب فى الورق على مكتبك وتفكر فى الحاجات البسيطة اللى بتشغل بالك غير الكارثة وساعتها بتحس إن الحياة تافهة
لكن عن تجربة
أحيانا الناس بتساعد
أحياااااااااناااااا مش دايما
فكر وعيد حساباتك
يمكن تقدر تلاقى الأمان من جديد
يمكن تقدر تخرج من جلستك طول اليوم مع نفسك
تحياتى
شاب فقرى

هناك 8 تعليقات:

  1. عندك حق فى كل كلمة محدش عمره هيقدر مقدار الالم اللى جواك
    بس اللى بيعيش فى الوحدة سنين زى ما قولت فى البوست فى المدونة التانية مش بيقدر يرجع للدنيا بسهولة

    ردحذف
  2. ممكن اقولك تعليقا على البوست دا

    ان قياس حجم المشاكل الشخصيه هو شئ نسبي في معظم الأحيان
    فمقدار حجم المشكله هي بمقدار احساس صاحبها بها.

    انا ممكن تكون مشكلة في حياتي جامدة جداً ان الباور بتاع الكمبيوتر بتاعي المروحة بتاعتي بتعمل صوت والصوت دا بكل بساطة بيضاقني جداً ويخليني مش مركز وانا عـ الكمبيوتر ... الحكاية دي ممكن تكون لا شئ بالنسبة لناس كتير ولكن بالنسبة لي دي ممكن تكون مشكله في حياتي.
    على فكره دا مثل فقط ولكن انا لو موتور شغال جنبي ممكن اتأقلم عليه عادي

    ردحذف
  3. Ana ba2a shayefa en el wi7da a7san 7ata law el nas betsa3ed a7yanan....

    ردحذف
  4. البوست ده اتكلم عن احساسين دايما الواحد بيحسهم لما يمر بمشكلة كبيرة في حياته ..الألم والوحدة...تعاملنا وقتها بيختلف من شخص لاخر وبيختلف كمان حسب نوع المشكله اللي بتقابلنا..يمكن في الوقت ده بس احنا اللي بنحتاج فيه للوحدة واحيانا بتباه لوحدها كفيله انها تخرجنا من مشكلتنا ..

    البوست جميل جدا ..
    تسلم ايدك

    ردحذف
  5. أحاسيس أيوشة
    مهما كان طريق العودة صعب
    ومستحيل
    لكنه موجود
    وصحيح الواحد هيتعب على ما يكسر الوحدة دى
    بس مسيره هيخرج منها
    لو قرر إنه يمشى فى الطريق اللى ممكن يخسر فيه كل شىء دا
    بس كدا
    نورتى
    فقرى

    ردحذف
  6. الباحث عن السلام
    مثالك مقبول ومفهوم
    لكن هسألك
    إذا محدش فهمك فى المشاكل البسيطة ومحسش بوجعك
    هل هتتوقع انه هيفهم لما تمر بمشكلة كبيرة او خسارة اكبر ؟
    الموضوع نسبى لا أكثر ولا أقل
    سعدت بمرورك وتعليقك :)
    فقرى

    ردحذف
  7. بسكوته
    هوا الوحدة تبقى ممتعه وحلوة لو مستمرة بشكل دايم
    يعنى مفيهاش كسر لشروطها او خروج لمدة كام شهر
    لان اللى بيعرف معنى الطيران مبيعرفش يقعد تانى فى مكانه عالارض
    لازم ميكسرش القوانين ولا يتخطى الحدود اللى عملها عشان يقدر يكمل ويعيش مبسوط فى الوحدة بتاعته سواء الناس بتساعده ولا لاء
    نورتى يا بسكوتيه :)

    ردحذف
  8. story pain
    ما هى لو الخسارة كبيرة
    الوحدة مش هتقدر تخلينا نعدى الموقف
    هنتألم أوى على ما نوصل للى إحنا عايزينه
    مش بالساهل
    لان احنا هنبقى عاوزين نعوض الخسارة
    زى ما تقولى كدا
    ممكن تبقى وحدة لو مفيش فى حياتنا غير شخص واحد بس هوا كل حاجة
    لما بيضيع بقى
    مش بنقدر عالوحدة ابدا باى شكل
    لان احنا خسرنا خسارة فادحة
    يا اما نعوضها
    يا اما نستمر فى الوحدة القاتلة
    والاتنين اصعب من بعض بمراحل
    :)
    نورتى جدا
    فقرى

    ردحذف