الأربعاء، 18 أغسطس، 2010

الاغتراب



اهه ما يفرقش كتير الاغتراب عن الوحده


الاغتراب إنك تكون عايش بين ناسك بس لوحدك

وعلشان اكون صريحه اكتر ماحدش سبب فالاغتراب دا غير نفسك


الاغتراب بيكون لسببين : إما انك رافض الناس

او إن الناس هما اللى رافضينك


وكلا السببين انت السبب فيهم ,, هاقولك ازاى بالتفصيل ,,, مانا مغتربه كبيره :)


السبب الاول :

الناس كلها غداره ,, صديقك خانك ,, وزميلك باعك ,, وحبيبك شاف حياته مع حد غيرك ,, واخوك وراه هم مايتلم ومش فاضى يسمعلك ,, وانت زهقت من غدرهم ,, كرهت تجاهلهم ,, فضلت تكون لوحدك لأن مافيش حد هيكون اصفى وانقى من نفسك ليك


السبب التانى :

الناس حواليك زى الفل ,, بس انت مش قادر تتقبلهم ,, عقلياتهم لا تتناسب مع عقليتك ,, بتستنكر تفكيرهم ,, حكياتهم لا تعنى لك شىء ,, مش طايقهم ,, ومش محتاج تحكيلهم ,, فبتختار تكون لوحدك فى وسط الزحمه ,, ماتسمعش غير صوت نفسك ,, تقتنع برأى نفسك ,, وتعجب جدا بتفكير نفسك .


لو بصيت للسبب الاول وهوه رفض الناس ليك والغدر والكلام دا ,, هتلاقى حله انك تنقى ناس صح ,, ناس تتقبلك ,, وإن غدر بيك عشره فيه عشرة ألاف غيرهم

والسبب التانى ووهوه رفضك انت للناس : فحله انك تتواضع وتسمع للاخرين وتمحى مبدأ الأنا من حياتك

هااااااااااا؟؟ مش انت السبب بقى فى اغترابك؟؟

:)

هناك 7 تعليقات:

  1. بصى
    انا ليه وجهة نظر
    الاغتراب فى معناه
    هوا اختفاء العادات والتقاليد وتغيير المجتمع اللى اتربينا فيه
    الواحد يتغرب فى قلب وطنه
    انتى قلتى الاغتراب الاسرى او عالمحيط الشخصى
    بيكون بالشكل دا كدا
    بس مش دايما حل المشكلات اللى بتتعلق بالوحدة بيكون بالسهولة الكافية عاللى حاسس بالموضوع
    انا سايف ان سبب اساسى للاغتراب الاسرى او عالمحيط الشخصى
    انك ممكن تبقى ناوى انك تضحى باى حاجة عشان الغير
    او حاطط فى دماغك انك بتعاملهم بشكل معين
    وبعدين يطلعوا هما ولا حاجة
    ولا هما فى دماغهم يعملوا لك المثل
    فجاة تكتشف ان محدش بيحبك
    او مفيش حد بيقدر حبك او اهتمامك
    فاهمانى ؟
    ان اللى بنبقى نفسنا نعمله للناس
    مش بنلاقيه منهم خالص
    بدون سبب
    مش عارف ليه ؟
    مع ان الواحد مقصرش
    سواء مع الاسرة او الصحاب او حتى فى الحب او فى اى علاقة
    لما بتلاقى حاجة غير متوقعها بتحس انك غريب عنهم
    انك واحد تانى
    العيشة مختلفة والدنيا غير الدنيا
    بس كدا :)

    تحياتى الدائمة ونورتى المدونة بالبوستات الجامدة :)
    شاب فقرى

    ردحذف
  2. جميل

    ودى اول حاله قولتها إن اللى اودامك دا خاين وغدر بيك وكنت رافعه فى السما مع إن مكانه تحت الارض ,, والحل انك تنقى صح ,, اختار الشخص اللى فعلا يستاهل الثقه دى ,, وتسيبك من الحد الوحش دا لأن فيه غيره ألف :)

    انا فاهمه جدا لأنى مريت بحاجه زى كده جدا فيما يخص الصداقه

    ورغم انى على حد علمى انى شخصيتى مش ضعيفه , إلا انى حسيت انى انكسرت وبقيت ضعيفه اوى ,, واللى حواليا بيندهشوا اوى إن الصداقه تعمل كده ,, بس انا مش مندهشه لأنها كانت صداقه حقيقيه على الاقل من ناحيتى انا ,, بس عادى هاتناسى مع الوقت ,, ومش هاختار حد غلط تانى :)

    صاحب المدونه هوه اللى منورها:)

    ردحذف
  3. الاغتراب..أقرب احساس للوحدة وفي الغالب بيكون أول سبب ليها..أنا معاك اننا احيانا بنباه سبب اغترابنا ووحدتنا...لما نبص لنص الكوبايه الفاضي ونشوف بس تجاربنا المؤلمة مع اصدقاءنا واحبابنا..لكن في ناس فعلا بتباه مختلفة وبتحس بالاغتراب مع اي حد لان كل المحيط اللي هي فيه مش متقبل الاختلاف ده..

    تسلم ايدك..عرضك للموضوع أكثر ن رائع

    ردحذف
  4. الاغتراب هو ان تشعر انك غريب في مجتمع " وان كان صغيرا مثال الاسرة " ومن المفترض انه انسب بيئة لك ،فمثلا هنالك الاغتراب وانت في وطنك عندما تعامل أسوأ معاملة وتهدر حقوقك وانسانيتك في حين انك تجد العكس في اي دولة اخرى غير وطنك ..
    الاغتراب وسط الاهل رغم انهم اول من عرفتهم وعرفوك في حياتك وهم ايضا من يعايشونك سنوات طويلة من حياتك لحظة بلحظة ولكن قد تجدهم مجرد اناس يؤدون واجبهم اتجاهك كإبن او كأخ ..الخ ولا تجد لنفسك مكانا بينهم ولا يجمعك بهم نقاش او اتفاق .. وهكذا كثيرة هي امثله الاغتراب في حياتنا ولكن قد يغترب المرء عن نفسه وتمر لحظة تشعر فيها انك لا تعرف نفسك ولا تستطيع ان تجدها مهما بحثت عنها وهو اشد انواع الاغتراب ..
    والحل الذي قدمتيه عزيزتي بخصوص السبب الاول ليس سهل التطبيق ، لاننا بطبيعه الحال عندما نختار صديق مثلا لا يكون في نيتنا اختيار صديق غير جيد ولكن نكتشف هذا مع الزمن ويحدث الاغتراب رغما عنا ،وفي رأيي ان حل الاغتراب ايا كان نوعه هو ان نخلق لانفسنا حياة تلائمنا في خيالنا ونحاول تطبيقها في الواقع وهنا سينجذب لنا ولعالمنا من هم متوافقون معنا ولن نشعر معهم بالاغتراب وهذا سيكون الاخيار الصحيح ...
    بوست رائع ومدونة اروع تمنياتي لفريق العمل بالتوفيق دائما

    ردحذف
  5. story pain :

    :)

    كلامك صح وجميل :)


    The Queen :

    اهه حل جميل جدا

    بس انا بما قولت نختار الصديق الصح فانا طبعا عارفه انه مش بايدينا , بس بايدينا اوى اننا نخليه مجرد زميل ولا يدخل فى دائرة الصداقه إلا اذا اثبت انه يستحقها اوى ,, وربنا يكرم

    كلامك جميل وينفع يبقى بوست جديد

    :)

    ردحذف
  6. فقرررررررررررررررررى

    فين جديدك؟؟

    ولا مابقتش وحيد ولا ايه؟؟

    ردحذف
  7. تعجبني طريقة تفكيرك فعلاً كل الكلام اللي قلتيه صح وبالملّي نحن مسئولون عن شعورنا بالغربة وأكثر شيئ عجبني لما قلتي (إذا غدر فيك عشرة في عشرة آلآف غيرهم ) موضوع حيوي شكراً لك .

    ردحذف